Link açıqlığı

Birleşken Milletler Teşkilâtınıñ İnsan aqları komiteti mart 16-da Jenevada işğal etilgen Qırımda söz serbestligi ve ATR birinci qırımtatar telekanalını qapatuv telükesini muzakere etti. Bunı Qırımtatar Milliy Meclis reisi Refat Çubarov bildirdi.

«Qırımda söz serbestliginiñ vaziyetini muzakere ettik. İşğal etilgen Qırımda söz serbestligi meselesine, şu cümleden ATR qırımtatar telekanalınıñ qayd olamağanını ve 2015 senesi aprel 1-den itibaren onı qapatuv telükesine ayrı diqqat ayırdıq...», – dep yazdı o Facebookta.

ATR telekanalı baş müdiriniñ malümat siyaseti boyunca muavini Lilâ Bucurova da telekanalnıñ yayınlanması toqtatıla bile, dep qorqa.

«Aprel 1-ge qadar, qayd işleriniñ müddeti bitkenine qadar, az qaldı. ATR dört kere vesiqalarnı teslim etken edi. Mart 31-de seyircilerimiznen sağlıqlaşmağa mecbur olacaqmız, dep qorqamız», – dep yazdı o.

Noyabr ayında Rusiye Devlet Duması Qırımnıñ kütleviy haber vastaları içün qayd müddetini 2015 senesi aprel 1-ge qadar arttırdı. Bu künge qadar olar Ukraina devlet organları bergen vesiqalar esasında çalışa bileler.

Qırımda 167 kütleviy haber vastası Rusiye qanunlarına köre yañıdan qayd oldı. Bu malümatnı fevral 10-da Qırım Devlet Şurasnıñ malümat siyaseti, bağ ve kütleviy alâqalar komitetiniñ toplaşuvında onıñ reisi Sergey Şuvaynikov aydınlatqan edi. Onıñ bildirgenine köre, daa 40 ariza tezden qayd etilecek.

XS
SM
MD
LG