Link açıqlığı

Çubarov: yıl evelsi qırımtatarlar Qırımnıñ qoruvı boyunca borcunı eda etti, arbiyler ise – yoq


2014 senesi fevral ayında qırımtatarlar öz vatandaşlıq borcunı yerine ketirdi – Ukraina topraq bütünliginiñ qoruvına turdı, amma Qırımda akimiyetniñ qanunsız sürette zapt etilmesine qarşı em ukrain, em qırım idarecileri, Qırımnı qorçalamağan arbiyler çıqmaq kerek ediler, – dep bildirdi Qırımtatar Milliy Meclis reisi Refat Çubarov Radіo Svoboda efirinde.

«Öz vatandaşlıq borcumıznı eda ettik – olarğa (işğalci ükümetke – muar.) açıq sessiyanı keçirmege imkân bermedik… Artımızdan ise Ukraina arbiyleri ve uquq qoruyıcı küçleri kelip, işbu binada (Qırım Yuqarı Şurasınıñ binası – muar.) yerleşmek kerek edi. Tam tersi oldı – saba saat dörtte Rusiye mahsus quvetleri kirdi», – dedi Refat Çubarov.

Qırımtatar Milliy Meclis reisi şunı da qayd etti ki, Ukrainada uquq qoruyıcı tertibatınıñ böyle areketsizligi artıq olmamalı.

«Ögrengen, devlet aylığını alğan, memleketni qorumağa borclu olğan on biñlerce arbiy insanlarnıñ areketsizligi artıq iç bir vaqıt olmamalı. Er bir insan mecburiyetini yerine ketirmek kerek», – dey Refat Çubarov.

2014 senesi fevral 26 künü Qırım Yuqarı Şurasınıñ deputatları nevbetten tış sessiyanıñ keçirilecegini ilân etti, on biñden ziyade insan Qırım ükümetiniñ binasına barışıq mitingi ile kelip, sessiyanı lâğu etmege talap etti. Ükümet insanlarnıñ talabı ile razı olğanından soñ, cemaat dağıldı. Saba erte Qırım Yuqarı Şurasınıñ silâlı zaptı keçirildi. Mart 16 künü qanunsız «referendum» keçti.

XS
SM
MD
LG