Ukraina Qırımnıñ naqliyat qamaçavı ve «Qırım» serbest iqtisadiy zonasınıñ çalışuv meseleleri boyunca qararlarını ğayrıdan baqmaq kerek. Bunı mart 16 künü Ukraina Nazirler Kabineti yanında Qırım meseleleri boyunca departament müdiri Aslan Ömer Qırımlı Qırım.Aqiqatqa bildirdi.
Onıñ sözlerine köre, Qırımda şimdi «eki milliondan ziyade mabüs buluna, amma bunıñ ile Ukrainada Qırım sakinleriniñ meseleleri ile oğraşaycaq mahsus devlet organı yoqtır».
Aslan Ömer Qırımlı aytqanı kibi, Ukrainada «2014 senesi iyül ayında teşkil etilgen, amma bugünge yalıñız kâğıtta qalğan» Qırım Muhtar Cumhuriyeti ve Aqyar meseleleri boyunca Devlet hızmeti alâ daa çalışmay eken.
«Qırımnıñ qaytarıluvı içün Ukraina devleti, mustaqilligi ve topraq bütünligini saqlamaq kerek olğanını añlaymız. Bunı etmek içün çağıruvğa lâyıq cevap bermek kerek. İlk nevbette, milliy havfsızlıqnıñ esas telükesi olğan qaparcılıqqa. Bunıñ ile kerçekten de çalışacaq islâatlarnı keçirmek kerek», – dep qayd etti o.
Al azırda Qırım ve Aqyar işleri boyunca Nazirler Kabineti yanındaki departament Qırımnıñ ve yarımadadan köçip kelgen vatandaşlarnıñ meseleleri ile oğraşqan yekâne organdır.
