Moskvada muhalifet küçleri ile alâqaları olğan Rusiye jurnalisti Kseniya Sobçak mahsus hızmetlerniñ tevsiyelerine emiyet berip, Rusiye Federatsiyasını terk etti.
Bunı «Kommersant» gazetası bildire.
Rusiye muhalifetçisi Boris Nemtsovnıñ öldürüvinden soñ kütleviy haber vastaları «qurşunğa tizileceklerniñ cedveli» aqqında haber etmege başladılar. Cedvelde meşur siyasetçiler ve jurnalistler, şu cümleden Sobçaknıñ soyadı da mevcut eken. Rusiye prezidentiniñ matbuat kâtibi Dmitriy Peskov bunı «olmaycaq bir şey» dep adladı.
Sobçak Nemtsov cenazesiniñ kününde onı qorqutmağa tırışqanlar bar, dep bildirdi. Onıñ aytqanına köre, vedalaşuv merasimi keçken Saharov merkezinde onıñ ve «Eho Moskvı» baş muarriri Aleksey Venediktovnıñ yanına erkek kelip, nevbetteki o olacağını ayttı.
Kseniya Sobçak Rusiyede televideniyede çalışa ve «L'Officiel» mecmuasınıñ baş muarriri ola.
Boris Nemtsov fevral 27-de aqşam Moskvanıñ merkezinde atıp öldürildi. Siyasetçiniñ öldürüvinde şeklengen beş insan yaqalandı.
