Aqmescitte mart 16-da Qırım parlamenti ögünde Qırımda olıp keçken sahte referendumnıñ yıllığı munasebetinen büyük Rusiye bayrağı açıldı.
Qırım.Aqiqat mühbiri bildire ki, bayraq açılğanda Rusiye gimni icra etildi, bayraqta ise qırımlılarnıñ teşekkürleri ile yazılar bar edi.
Devlet şurasınıñ binası yanında toplaşqanlar ögünde şimdiki akimiyetniñ vekilleri – Qırım yolbaşçısı Sergey Aksenov, spiker Vladimir Konstantinov ve Rusiye Federatsiyası prezidentiniñ Qırımdaki vekâletli temsilcisi Oleg Belaventsev çıqışta bulundılar.
Olar «Qırımnıñ evine qaytuv» quvançı aqqında ayttılar.
Malüm ki, Devlet şurasınıñ yol kirişleri ve etrafındaki soqaqlar qapatıldı, politsiya ve OMON hadimleri nevbetçilik yapa. Lenin meydanınıñ kirişleri de qapatıldı.
«Qırımnıñ Rusiyege qoşulmasınıñ» yıllığına bağışlanğan tedbirlerden sebep Qırım yolbaşçısı Sergey Aksenov mart 16-de iş kününi qısqarttı.
Vesiqağa binaen, devlet akimiyeti ve teşkilâtlarında iş künü bir saatke qısqartılacaq.
Mart 18 künü yarımadada tatil olaraq ilân etilgen edi. Bayram tedbirleriniñ çoqusı Qırımnıñ paytahtı Aqmescitte keçirilecek. Aqmescitniñ Lenin meydanında tantanalı toplaşuv ve bayram kontserti ötkerilecektir.
