Kiyevde bazar künü, mart 15-te, «Almenda» vatandaşlar maarifi merkeziniñ faalleri «Yaz. Deñiz. Plâj. Referendum» adlı fleşmobnı keçirdiler. Böylece, aktsiya iştirakçileri bir yıl evelsi Qırımda olıp keçken sahte referendumnıñ «qanunğa uymağanını» köstermege tırıştılar, – dep bildire Qırım.Aqiqat mühbiri.
Faaller masa, rey berüv qutularını qoydılar, saylav komissiyasınıñ azalarını davet etip, bülletenlerni azırladılar.
«Bülletenlerimizdeki sualge bir cevap bar, amma eki farqlı şekli mevcut. Angisini qayd etersiñiz müim degil – cevap deñişmey. Aynısı Qırımdaki referendumda olğan edi. Yani, cevabıñız nasıl olsa da, siziñ içün cevap berdiler», – dep ayttı faal Gülnara Abdulgaziyeva.
Kiyevge «Qırım referendumını» kösterdiler
Fleşmob iştirakçileri – 2014 senesi yarımadada olıp keçken adise-vaqialarnıñ şaatları olğan Qırımdan köçip kelgen adamlardır.
«Bizler Kiyev sakinlerine bir yıl evelsi Qırımda olğanlarnı hatırlatmaq isteymiz. Referendum şeklinde olğan fars aqqında tarif etmek isteymiz. Qırım – Ukraina olğanını aytmaq isteymiz», – dep qayd etti Ruslan Neçiporuk, «Almenda» vatandaşlar maarifi merkeziniñ faali.
Sanalaştırılğan «rey berüvde» 112 insan iştirak etti.
Bazar künü, mart 15-te, Lvivde Qırım faalleri ve cemaat teşkilâtları referendumnıñ yıllığına bağışlanğan aktsiyanı keçirdiler. Faaller Svoboda caddesindeki Taras Şevçenkonıñ eykeline «Qırım – Ukrainadır», «Donbass + Qırım – bir ağrı» ve «Putin, Ukrainadan elini çek» şiarları ile çıqtılar.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
