«Volınniñ qırımtatarları» cemaat teşkilâtı Lutsk şeeriniñ Teatralnaya meydanında Rusiyeniñ Qırım işğaline qarşı narazılıq aktsiyasını keçirdiler. Bunı bazar künü, mart 15-te, «Pro Volın» haber portalı haber ete.
«Bizler böyle etip Qırım işğaline qarşı narazılıq bildiremiz. Bir yıl evelsi, mart 16-da, anda, Qırımda, sahte referendum olıp keçken edi», – dep bildirdi teşkilât reisi Server Zeynidinov.
Aktsiyada «Samopomoşç» cemaat teşkilâtınıñ faalleri, şu cümleden köçmege mecbur olğan adamlarğa yardım etken göñülliler iştirak ettiler, dep bildire neşir. Tedbir fotoresimlerini Sergey Romanük Facebook saifesinde yerleştirdi.
Malüm olğanı kibi, bazar künü, mart 15-te, Kiyevde «Almenda» vatandaşlar maarifiniñ merkez faalleri «Yaz. Deñiz. Plâj. Referendum» adlı fleşmobını keçirdiler. Böylece, aktsiya iştirakçileri bir yıl evelsi Qırımda olıp keçken sahte referendumnıñ «qanunğa uymağanını» köstermege tırıştılar.
Bazar künü, mart 15-te, Lvivde Qırım faalleri ve cemaat teşkilâtları referendumnıñ yıllığına bağışlanğan aktsiyanı keçirdiler. Faaller Svoboda caddesindeki Taras Şevçenkonıñ eykeline «Qırım – Ukrainadır», «Donbass + Qırım – bir ağrı» ve «Putin, Ukrainadan elini çek» şiarları ile çıqtılar.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
