«Tsentr jurnalistskih rassledovaniy» haber agentliginiñ Qırım muarririyetiniñ hadimlerine uquq qoruyıcılar kele bile, – dep bildirdi adliyeci Cemil Temişev, jurnalist Natalya Kokorinanıñ yaqalanmasını izaatlap.
Temişev «Tsentr jurnalistskih rassledovaniy» neşiriniñ diger hadimlerine adliyecilerge muracaat etmege tevsiye etti, çünki «olarğa nisbeten taqiqat tedbirleri keçirile bile».
Berilgen malümatqa köre, Natalya Kokorina FSB (Federal havfsızlıq hızmeti) tarafından şaat olaraq sorğuğa çekildi. Adliyecisiniñ aytqanına köre, bu «Tsentr jurnalistskih rassledovani» neşiriniñ işinen bağlı. O, tafsilâtlı malümat bermeyip, Kokorina «Krım» batalyonı aqqında maqaleden sebep sorğuğa çekilgenini ayttı.
Temişevniñ aytqanına köre, FSB Kokorinanı tekrar sorğuğa çeke bile.
Cuma künü, mart 13-te, FSB hadimleri işğalden soñ Qırımnı terk etip, al-azırda Kiyevde yaşağan daa bir Qırım jurnalisti Anna Andriyevskayanıñ ana-babası yaşağan dairede tintüv keçirdiler. Jurnalistniñ babasına Aqmescit mahkemesiniñ qararını kösterdiler. Vesiqağa binaen, Andriyevskayağa nisbeten «Qırımda akimiyetni devirmek çağıruvları ile maqale içün» cinaiy iş açıldı.
OSCE söz serbestliği reisi Dunja Mijatović Qırımda jurnalistlerge yapılğan basqını takbih etip, «Tsentr jurnalistskih rassledovaniy» haber neşiriniñ jurnalisti Kokorinanı acele sürette azat etmege çağırdı.
