Qırım jurnalisti Natalya Kokorina ve onıñ adliyecisi Cemil Temeşev FSB binasından çıqtılar, dep haber ete Qırım.Aqiqat mühbiri.
Qırım jurnalisti Natalya Kokorinanıñ sorğusı altı saat sürdi.
Qırım.Aqiqat mühbiriniñ bergen malümatına köre, aqşam üstü FSB binasınıñ yanına «1 Krımskiy» kanalınıñ jurnalistleri ile maşina keldi. Bundan soñra uquq qoruyıcı organlarnıñ hadimi FSB binası yanında toplaşqan kütleviy haber vastalarınıñ vekillerine «yarım saatten soñ taqiqat tedbirleriniñ» yekünleycegini bildirdi.
Malüm olğanı kibi, mart 13-te saba «Tsentr jurnalistskih rassledovaniy» mühbiri Natalya Kokorina işdeşlerine saat 8:00 oña ana-babasınıñ dairesine kelmege rica etkenlerini haber etti. O, dairege kelgen soñ onıñnen bağ üzüldi. Tintüvden soñ onı yaqaladılar.
Cuma künü, mart 13-te, FSB hadimleri işğalden soñ Qırımnı terk etip, al-azırda Kiyevde yaşağan daa bir Qırım jurnalisti Anna Andriyevskayanıñ ana-babası yaşağan dairede tintüv keçirdiler. Jurnalistniñ babasına Aqmescit mahkemesiniñ qararını kösterdiler. Vesiqağa binaen, Andriyevskayağa nisbeten «Qırımda akimiyetni devirmek çağıruvları ile maqale içün» cinaiy iş açıldı.
OSCE söz serbestliği reisi Dunja Mijatović Qırımda jurnalistlerge yapılğan basqını takbih etip, «Tsentr jurnalistskih rassledovaniy» haber neşiriniñ jurnalisti Kokorinanı acele sürette azat etmege çağırdı.
