Qırım akimiyeti milletlerara zıddiyetlerni nezaret etmege istey. Qırım Nazirler şurasınıñ reis muavini Ruslan Balbek dedi ki, yarımadada «milletlerara munasebetlerniñ al etüv usulları keyfiyetli oldı». Bunı Balbek cuma künü, mart 13-te, Qırımda milletlerara alâqalar inkişafınıñ informatsion ve içtimaiy imkânları nezaret merkeziniñ açılış tedbirinde ayttı.
Onıñ bildirgenine köre, «devletniñ strategik olaraq müim olğan vazifesi – farqlı millet ve din vekilleri olğan qırımlılar arasında zıddiyetler olmasına yol bermemektir».
«Nezaret merkeziniñ meydanğa ketirilmesi ealiniñ bir qısmı yañlış añlaması mümkün informatsion viruslarnıñ birinci basamaqlarda toqtatmağa yardım etecek. Bugünde-bugün buña yol bermemek strategik olaraq ğayet müimdir. Merkez devlet ve cemaatqa milletlerara barışıq ve istiqrarnı saqlap qalmağa yardım etecek qoşma aletni bermek kerek», – dep añlattı Qırım baş naziriniñ muavini.
Qırım ükümetiniñ matbuat hızmeti bildire ki, merkez Rusiye Federatsiyasınıñ devlet milliy siyasetini Qırımda amelge keçirmek, milletlerara ve dinlerara munasebetlerde zıddiyetlerge yol bermemek maqsadı ile meydanğa ketirildi.
Merkez kütleviy haber vastaları, akimiyet organları, Qırımda «milletlerar munasebetlerniñ vaziyetine menfiy tesir ete bilecek faktlarnı» nezaret etecektir.
Müessise erkânına 24 insan kirdi – siyasetşınas, ruhiyatçı, Vernadskiy adına Qırım federal universiteti ve Qırım müendislik-pedagogika universitetiniñ mütehassısları.
