Qırımtatar Milliy Meclis reisi Refat Çubarovnıñ fikrine köre, Qırımda ealini repressiyalar vastası ile, şu cümleden jurnalistlerge nisbeten de, qorqutmağa tırışacaqlar.
Böylece o, Qırım.Aqiqatqa mart 13 künü Rusiye FSB hadimleri tarafından Qırım jurnalistleriniñ evlerinde keçirilgen tintüvlerni izaatladı.
«Biz mından, Kiyevden, bu insanlarğa yardım yolunı qıdırmalımız, olarnıñ ana-babalarını, Qırımda bulunğan jurnalistlerniñ özlerini nasıl etip qorumaqnı tüşünmelimiz. Bir tek aletimiz bar – azamiy faş etüv, halqara jurnalist ve uquq qoruyıcı teşkilâtlarına muracaat etüv kibi», – dedi Çubarov.
Meclis başı aytqanı kibi, bir qaç künden soñ o, ukrain ekspertleri ile, em de İnsan aqları boyunca Ukraina Yuqarı Şurasınıñ vekâletlisi Valeriya Lutkovskaya ile Jenevada İnsan aqları boyunca BMT Şurası diplomatlarınen körüşecek. Körüşüvde Qırımda, şu cümleden matbuat vasatalarına nisbeten de olğan soñki repressiyalar meselesi köterilecek.
Cuma künü, mart 13-de, FSB (Federal havfsızlıq hızmeti) hadimleri Qırımnıñ statusı aqqında «refederndumdan» soñ Qırımdan Kiyevge köçip kelgen Qırım jurnalisti Anna Andriyevskaya ana-babasınıñ dairesinde tintüv keçirdiler. Andriyevskaya Qırım.Aqiqatqa aytqanı kibi, ana-babası saba erte telefon etip, babasınıñ bilgisayarını tutıp alğan FSB hadimleriniñ ziyareti aqta bildirdiler.
Aynı vaqıtta «Tsentr jurnalistskih rassledovaniy» mühbiri Natalya Kokorinanıñ dairesinde de tintüv keçirildi. Tintüvden soñ Kоkorinanı FSB idareisne alıp kettiler.
