Cuma künü, mart 13-de, FSB (Federal havfsızlıq hızmeti) hadimleri Qırımnıñ statusı aqqında «refederndumdan» soñ Qırımdan Kiyevge köçip kelgen Qırım jurnalisti Anna Andriyevskaya ana-babasınıñ dairesinde tintüv keçireler.
Andriyevskaya Qırım.Aqiqatqa aytqanı kibi, ana-babası saba erte telefon etip, babasınıñ bilgisayarını tutıp alğan FSB hadimleriniñ ziyareti aqta bildirdiler.
«Er vaqıt skypе ile bağlana edik, amma bilgisayarnı tutıp alğanları içün telefon ettiler. Babama Aqmescit mahkemesiniñ qararını kösterdiler. Vesiqada maña qarşı cinaiy işniñ açılması bildirile, sanki men Qırımda akimiyetniñ dağıtıluvına çağırğan bir malümatnı aşkâr etkenim», – tarif ete Andriyevskaya.
Onıñ sözlerine köre, söz oktâbr ayında «Tsentr jurnalistskih rassledovaniy» saytında basılğan maqale aqqında kete.
«Maqale «Qırım» batalyonınıñ göñüllileri aqqında tarif ete, nasıl bir teşkilât, nasıl işley, amma anda yarımada akimiyetiniñ dağıtıluvına iç bir çağıruv yoqtır ki», – qayd etti jurnalist.
«Ümüt etem ki, ana-babamnı buña celp etip, maña basqı köstermege tırışmazlar», – dep qoştı Andriyevskaya.
Aynı vaqıtta «Tsentr jurnalistskih rassledovaniy» mühbiri Natalya Kоkorinanıñ dairesinde de tintüv keçirile.
«Tintüv sebepleri belgisiz – dairege kirgeninden soñ mühbirimiz ile bağ üzüldi, ev kirişinden FSB hadimleri kimseni kirsetmey», – dep yaza neşir.
Evel Natalya Kоkorina zenaatdaşlarına bildirgeni kibi, saba saat sekizlerde oña telefon etip, ana-babası yaşağan dairge kelmege çağırdılar (özü olardan ayrı yaşay).
Qırım.Aqiqat mühbirleri de jurnalistnen bağlanmağa areket etti, amma o cevap bermey.
