Link açıqlığı

Qırımda Şevçenko hatırasına mitingniñ üçünci iştirakçisini cemaat işleri ile cezaladılar


Leonid Kuzmin

Aqmescitniñ Demir yol mahkemesinde mart 9 künü Gagarin bağçasındaki ukrain şairi Taras Şevçenkonıñ hatırasına bağışlanğan aktsiyanıñ üçünci iştirakçisi Leonid Kuzminniñ işi boyunca mahkeme toplaşuvı soñuna yetti. Qırım.Aqiqat mühbiri aytqanı kibi, oña 40 saatlik mecburiy işlerni belgilediler. Onı Rusiye qanunlarına köre «toplaşuv, miting, numayış, yürüş ya da piket ötkerilmesiniñ teşkil etüv qaidelerini bozuvda» qabaatlı olaraq tanıdılar.

Leonid Kuzmin mahkeme qararına itiraz bildirecegini qayd etti.

«Mahkeme qararı ile razı degilim, qanun boyunca itiraz bidirecek olam», – dey Kuzmin.

Faalniñ adliyecisi Emil Kürbedinov de işbu qararğa itiraz arizası berilecegini bildirdi.

«Küzminge nisbeten mahkeme qararı boyunca mıtlaqa itiraz arizasını berecekmiz. Aktsiyanıñ cemaat işleri ile cezalanğan daa eki iştirakçisi itiraz bildirmege-yoqmı, daa tüşüneler», – dedi Emil Kürbedinov.

Evel bildirilgeni kibi, ukrain şairi Taras Şevçenkonıñ hatırasına keçirilgen aktsiyanıñ daa eki iştirakçisine 40 saatlik mecburiy işler belgilendi.

Leonid Kuzmin, Vildar Şukurciyev ve Aleksandr Kravçenko mart 9-da Aqmescitniñ Gagarin bağçasında ukrain şairi Taras Şevçenkonıñ hatırasına keçirilgen aktsiyada yaqalanıp, Demir yol rayon politsiya bölügine alıp ketirilgen ediler.

Qırım.Aqiqatnıñ bildirgenine köre, Leonid Kuzminni Aqmescitniñ mektebinden işten boşattılar.

XS
SM
MD
LG