Aqmescitte mart 9-da Gagarin bağçasında ukrain şairi Taras Şevçenkonıñ hatırasına keçirilgen miting iştirakçilerine nisbeten memuriy işlerni baqmağa başladılar.
Qırım.Aqiqat mühbiri bildire ki, mahkemeci faal Vildar Şukurciyevniñ qararını çıqardı. Onı Rusiye qanunlarına köre «toplaşuv, miting, numayış, yürüş ya da piket ötkerilmesiniñ teşkil etüv qaidelerini bozuvda» qabaatlı olaraq tanıdılar.
Bu bozuv on biñden yigirmi biñ rublege qadar para cezasını ya da mecburiy işlerni belgiley.
Oña 40 saatlik mecburiy işlerni belgilediler, amma bir künde 4 saaten çoq degil.
«Men bu qararğa razım, oña itiraz bildirmeycem», – dep ayttı faal.
Şukurciyev Aqmescitniñ Şevçenko bağçasında mecburiy işlerni yapacağına ümüt ete.
Şimdi ekinci faal Aleksandr Kravçenkonıñ işi baqılmaqta, soñra ise aktsiya teşkilâtçısı Leoind Küzminni mahkeme etecekler.
Leonid Kuzmin, Vildar Şukurciyev ve Aleksandr Kravçenko mart 9-da Aqmescitniñ Gagarin bağçasında ukrain şairi Taras Şevçenkonıñ hatırasına keçirilgen aktsiyada yaqalanıp, Demir yol rayon politsiya bölügine alıp ketirilgen ediler.
Qırım.Aqiqatnıñ bildirgenine köre, Leonid Kuzminni Aqmescitniñ mektebinden işten boşattılar.
