Aqmescitte mart 12 künü Rusiye tarafından yarımada işğaline bağışlanğan «Qırım baariñ» fotosergisi açıldı.
Qırım.Aqiqat mühbiri aytqanı kibi, sergini Qırımnıñ iç siyaset, informatsiya ve bağ nazirligi tarafından Devlet akademik muzıkalı teatrinde (evelden Qırım akademik ukrain muzıkalı teatri edi) keçirildi.
Fotolarda keçken seneniñ fevral-mayıs aylarında olıp keçken vaqialar aks etilgen.
Sergide Qırım sakinlerinin müellifligi olğan 90 iş taqdim etildi. Bazılarına fotosergi teşkilâtçılarından hatıra diplom ve bahşışlar berildi.
Qırımnıñ baş nazir muavini, iç siyaset, informatsiya ve bağ naziri Dmitriy Polonskiy aytqanı kibi, bu işler «Qırım baariniñ» eñ parlaq adiselerini aks ete ve şimdiki Qırım akimiyeti içün tarihiy emiyetini belgiley, şunıñ içün sergini Tavrida Merkeziy müzeyine bermege planlaştıralar.
Polonskiy aytqanı kibi, sergi teşkilâtçıları «Qırım künleri»nde Moskvada taqdim etilecegi aqta añlaştılar.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
