Link açıqlığı

Saatnıñ esas haberi

Kiyevde qırımtatar halqınıñ vaziyeti aqqında maruzanı taqdim ettiler


Ukraina prezidentiniñ qırımtatar halqınıñ işlerinden vekâletlisi Mustafa Cemilev faaliyetini temin etüv bölügi «Qırımtatar halqı 2015 senesi başında» serlevalı analitik maruzanı azırladı.

46 saifeli maruza mart 12 künü Kiyevde bölükniñ başı Arsen Jumadilovnıñ tarafından taqdim etildi, dep haber ete Qırım.Aqiqat mühbiri.

«Maruzanı qırımtatar halqına olğan nazarnı deñiştirmek içün azırladıq. Adet üzre, qırımtatarlar aqqında laf başlağanda, ayrı ceyetten söz yürütile: ya işğalde yaşağan halq, ya sürgün etilgen şahıslar, ya da tamır halq olaraq. Maruzada şunı qayd ettik ki, qırımtatar meseleni baqqanda, onı er ceetten baqmaq kerek», – dedi Jumadilov.

Maruza üç qısımdan ibaret. Birincide qırımtatarlarnıñ Ukraina tamır halqı olaraq aqlarınıñ uquqiy ceetten teminlevi aqqında söz yürütile. Ekincisinde – aqlarınıñ sürgün etilgen vatandaşlarnıñ aqları olaraq amelge keçirilmesi. Üçüncisinde – qırımtatar halqınıñ işğal etilgen Qırımdaki vaziyeti aks etile.

Jumadilovnıñ sözlerine kore, bu kibi maruzalar er yıl yazılıp, çeşit tillerge tercime etilecek ve halqara toplulığı arasında tarqatılacaqtır.

XS
SM
MD
LG