Mart 11-de Qurman rayonınıñ Temir köyünde yaqalanğan Talât Yunusov Aqmescitte Taqiqat komitetinde buluna.
Bunı babası Asan Yunusov Qırım.Aqiqatqa bildirdi.
Onıñ aytqanına köre, oğlu yaqalanğan soñ evlerinde eki saat devamında tintüv keçirildi.
«Bir şey tapmadılar. Men ne qıdırasıñız dep soradım – taqiqat tedbirleri keçirilgenini ayttılar. Oğlumnı 2014 senesi fevral 26-da Qırım Yuqarı Şurasınıñ binası yanında keçirilgen mitingde birisine zarar ketirmesine şekleyler», – dep ayttı Yunusov.
Onıñ qayd etkenine köre, Taqiqat komitetiniñ vekilleri vesiqasız tintüv keçirmege keldiler. Saipler açuvlanmağa başlağan soñ bunıñnen bağlı vesiqanı kösterdiler.
Rusiye uquq qoruyıcılarınen beraber yaqalanğa berilgen adliyeci de keldi.
«Özüni tanıtmadı. Men bu qadın kim ve tintüvni ne sebepten nezaret etkenini soradım, dediler ki, oğlumnıñ adliyecisi, Papçuk Yuliya Yevgenyevna», – dep ayttı Yunusov.
Asan Yunusovnıñ bildirgenine köre, Talât yaqalavdan soñ bir qaç saat keçkende telefon etip, Aqmescitte Turgenev soqağı, 16 adresi boyunca bulunğanını bildirdi.
Çarşenbe künü, mart 11-de, saba Qurman rayonınıñ Temir köyünde (Yastrebovka) 1984 senesi doğma Talât Yunusov yaqalandı. Babasınıñ aytqanına köre, saba saat 7-de evlerine silâlı adamlar kirdi.
Keçken afta, mart 6-da, bu iş boyunca Asan Çaruhov yaqalanğan edi. Bir qaç saat devam etken sorğudan soñ onı azat ettiler.
Bundan evel Rusiye Taqiqat komiteti Qırımtatar Milliy Meclisiniñ reis muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgilediler.
«Fevral 26 künü» işi çerçivesinde uquq qoruyıcılar mitingniñ daa bir iştirakçisi Eskender Kantemirovnı da yaqaladılar. Oña eki aylıq apis cezası belgilendi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
