Cumaaqşamı künü, mart 12-de, Kiyevde Rusiye Federatsiyasınıñ elçihanesi yanında yerli saatke köre saat 13:00 qırımlılarğa yapılğan basqı, adamlarnı qaçıruv ve horlavğa narazılıq bildirmek içün piket keçirilecek.
Bunı «Qırım» batalyonı bildire.
Böylece, al-azırda Aqmescitteki SİZOda bulunğan Euromaydannıñ Qırım faali Aleksandr Kostenko ve Rusiye mahsus hızmetleri Qırımda yaqalağan ve Moskvada terakt azırlanmasında şeklengen rejissör Oleg Sentsov aqqında laf kete.
Qırım Euromaydanınıñ faali Aleksand Kostenkonı Qırımda fevral 8-de yaqaladılar. Onı Rusiye Cinaiy kodeksi 115-inci maddesiniñ 2-nci qısmı «b» noqtasınıñ cinayetinde («siyasiy, milliy ve diniy nefret ya da dava sebebinden sağlıqqa ketirilgen zarar») qabaatlaylar.
Rusiye uquq qoruyıcıları onı 2014 senesi fevral 18-de Kiyevdeki Ukraina içki işler nazirliginiñ hadimine taş atmasında qabaatlaylar.
Aleksandr Aqmescitniñ SİZOsında buluna. Onıñ bildirgenine köre, onı qıynaylar.
Aleksandr Kostenkonıñ babası mart 4-te ğayıp olıp, şimdige qadar bağğa çıqmay. Soy-sopları onı oğluna qorqutmaq içün qaçırğanlarından qorqa.
