Link açıqlığı

Saatnıñ esas haberi

Kiyevde Bağçasaraynıñ meşur yerlerini kösterecekler ve haytarmanı oynamağa ögretecekler


Bağçasaraydaki Hanlar sarayı
Bağçasaraydaki Hanlar sarayı

Bazar künü, mart 14-te, Kiyevde «Sofiya Kiyevskaya» milliy qoruğında köçip kelgen qırımlılarnıñ körüşüvi ötkerilecek. Tedbirde Bağçasaray rayonınıñ meşur yerlerini kösterecekler ve Qırım halqlarınıñ medeniyetleri aqqında tarif etecekler. Bunı «Qırım diasporası» göñülliler cemaat teşkilâtı Qırım.Aqiqatqa bildirdi.

Teşkilâtçılarnıñ malümatına köre, «Qırımnı sevem» adlı körüşüvde yarımadanıñ qadimiy ve zemaneviy ealisi (alan, got, ermeni, yunan, qaray, qırımtatar, rom, rus, ukrainler ve digerler) aqqında meraqlı şeyler aytacaqlar.

«Körüşüv çerçivesinde musafirimiz Elnara Halilova bala ve büyükler içün qırımtatar haytarması dersini berecek, em de viktorinada iştirak etmek imkânı olacaq», – dep haber ete «Qırım diasporası».

Kiyev saatine köre saat 16-da başlanacaq tedbirni ziyaret etecek adamlarğa elektron şekilni toldurmağa tevsiye etile.

Cemaat teşkilâtı qayd ete ki, bunıñ kibi körüşüvler yıl devamında er ay keçirilecektir.

Fevral ayında körüşüv Aluşta ve Ermeni Bazarğa bağışlanğan edi, aprelde Yaltağa bağışlanacaq. Bu tedbirlerni Qırım işğalinden soñ qıtaiy Ukrainaga köçip kelgen tarihçılar ve bu sakinlerniñ sakinleri azırlaylar.

XS
SM
MD
LG