Link açıqlığı

Çubarov: Qırımda iç bir kimse yapqan qanunsızlıq ve basqıdan soñ mesüliyetten çekilemez


Refat Çubarov

Qırımtatar Milliy Meclisiniñ reisi Refat Çubarov Strasbourgda Avropa parlamentiniñ vekilleri ile körüşip, mart 11-de Qırımda keçken sene fevral 26-da olıp keçken mitingde iştirak etken qırımtatar faali Talât Yunusovnıñ yaqalanmasını muzakere etti. Bunı Çubarov Facebook saifesinde bildirdi.

Meclis reisiniñ aytqanına köre, Ğarpnıñ Rusiyege munasebeti Qırımnıñ Ukraina nezareti altına qaytqanına qadar deñişmeycek.

«Eminim, Qırımda iç bir kimse yapqan qanunsızlıq ve basqıdan soñ mesüliyetten çekilemez. Avropa parlamentinde keçirgenim eki kün daa bir kere bir şeyden emin olmağa imkân berdi – Rusiye cenkni bitirgenine qadar ve Qırımnı azat etkenine qadar Ğarpnıñ oña olğan munasebeti deñişmeycek», – dep yazdı Çubarov.

Çarşenbe künü, mart 11-de, saba Qurman rayonınıñ Temir köyünde (Yastrebovka) 1984 senesi doğma Talât Yunusov yaqalandı. Babasınıñ aytqanına köre, saba saat 7-de evlerine silâlı adamlar kirdi.

Keçken afta, mart 6-da, bu iş boyunca Asan Çaruhov yaqalanğan edi. Bir qaç saat devam etken sorğudan soñ onı azat ettiler.

Bundan evel Rusiye Taqiqat komiteti Qırımtatar Milliy Meclisiniñ reis muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgilediler.

«Fevral 26 künü» işi çerçivesinde uquq qoruyıcılar mitingniñ daa bir iştirakçisi Eskender Kantemirovnı da yaqaladılar. Oña eki aylıq apis cezası belgilendi.

2014 senesi fevral 26 künü Qırım parlamenti yanında Qırımtatar Milliy Meclis ve «Rus birligi» («Russkoye yedinstvo») tarafdarları ile kütleviy miting keçti.

XS
SM
MD
LG