Link açıqlığı

Halqara para fondu (MVF) Extended Fund Facility programması boyunca Ukrainağa maddiy yardım berilmesini belgiledi. Bunı çarşenbe künü, mart 11-de, Radio Svoboda bildirdi.

«MVF müdirler şurası 17,5 milliard dollar miqdarında EFF programmasına qoltuttı», – dep qayd etti MFV emir müdiri Christine Lagarde.

Mart 10-da Ukraina prezidenti Petro Poroşenko Ukrainağa kenişletilgen maddiy paranı almağa imkân berecek qanunlarnı imzaladı.

Fevral 12-de Halqara para fondu Ukraina ile yardım programmasını belgiledi: eñ yaqın dört yıl devamında Ukraina 17,5 milliard dollarnı alacaq.

Ukrainada MVF missiyasınıñ yolbaşçısı Nikolay Georgiyevniñ aytqanına köre, Halqara para fondunıñ müdirler şurası Ukrainanı maliye etüv qararını eñ yaqın dört afta devamında qabul ete bile.

Fond qayd ete ki, yardım belgilengen para miqdarı ile sıñırlanmaycaq, çünki Avropa rekonstruktsiya ve inkişaf bankı, Bütün dünya bankı, Amerika Qoşma Ştatları ve diger devletler bu sene ukrain islâatlarınıñ donorı olmağa razı oldılar.

Yanvar ayında Bütün dünya bankı Ukraina iqtisadiyatınıñ 2015 senesi 1%-dan 2,3%-ğa qadar tüşüv tahminini fenalaştırdı.

Devlet statistika hızmetiniñ beyanatına binaen, Ukrainadaki inflâtsiya 2014 senesi aman-aman 25% teşkil etti.

XS
SM
MD
LG