Qırımnıñ paytahtı Aqmescitteki Borçoqraq (Fontanı) qasabasında OMON askerleri adamlarnı toqtatıp, vesiqalarnı köstermege talap eteler. Bunı çarşenbe künü, mart 11-de, aqşam «Tsentr jurnalistskih rassledovaniy» bildire.
Neşirniñ malümatına köre, adamlarnı avtobuslarnıñ soñki durağında tinteler. Bir qaç adamnı yaqaladılar.
«Mında yüksek rutbeli uquq qoruyıcılar çoq, adamlarnı sorğuğa çekeler. Eki «Gazel» tura, adiy urbada adamlar da çoq. Adamlar özara terrorizmge qarşı tedbirler aqqında laf eteler», – aytıla beyanatta.
Şaatlarnıñ bildirgenine köre, arbiyler er bir maşinanı toqtatıp, olarnı tintmekteler.
Qırım İçki işler nazirliginiñ resmiy saytında terrorizmge qarşı tedbirler ya da başqa tedbirler aqqında malümat yoq.
