Aqmescitte ukrain şairi Taras Şevçenkonıñ hatırasına bağışlanğan aktsiyanıñ teşkilâtçısı Leonid Kuzmin Aqmescit mektebinden işten boşatıldı. O, tarih ocası olıp çalışqan edi. Qırım.Aqiqat mühbiri bildire ki, mektep memuriyeti ocanı «vazifege uymağanından sebep» işten boşattı.
Leonid Kuzmin mektep memuriyetiniñ qararına itiraz bildirecekmi daa bilmey.
«Bu qararğa itiraz bildirecemmi daa bilmeyim. Tüşünem», – dep ayttı qırımlı Qırım.Aqiqat mühbirine.
İnsan aqları Qırım alan missiyasınıñ malümatına köre, Kuzminni madde boyunca işten boşatmağa vade etken ve ariza yazıp işten çıqmağa tevsiye etken ediler.
Malüm ki, Leonid Kuzmin, Aleksandr Kravçenko ve Vilidar Şukurciyevni politsiya hadimleri yaqaladı, olarnıñ sözlerine köre, sebep – mitingde ukrain timsalleriniñ olmasıdır.
Olarnı Rusiye Federatsiyasınıñ memuriy bozuluvlar aqqında Kodeksiniñ 20-maddesi boyunca qabaatlaylar – toplaşuv, miting, numayış, yürüşniñ belgilengen nizamınıñ bozuluvıdır.
Aqmescitniñ Demir yol rayon mahkemesi üç Qırım faaliniñ memuriy bozuv işiniñ baqılmasını mart 12 künü sabağa qaldırdı. Yaqalanğan faallerniñ adliyecisi Emil Kürbedinov işni ögrenmek içün muracaat etken soñ mahkeme yarınğa qaldırıldı.
