Mart 11-de Qırımda «fevral 26 işi» boyunca yaqalanğan Talât Yunusovnıñ evinde tintüv keçirilmekte. Bunı Qırımtatar Milliy Qurultayı Merkeziy saylav komissiyasınıñ reisi, qırımtatar areketiniñ faali Zair Smedlâyev Facebookta bildirdi.
«Bugün saba Aqmescit şeerine sorğu içün alıp ketirilgen Talât Yunusovnıñ evinde tintüv keçirilmekte. Añlaşıla ki, Talât apske alınacaq, yañılmaq ister edim», – dep ayttı Smedlâyev.
Qırım.Aqiqat neşiri bildirgeni kibi, çarşenbe künü, mart 11-de, saba Qurman rayonınıñ Temir köyünde (Yastrebovka) 1984 senesi doğma Talât Yunusov yaqalandı. Babasınıñ aytqanına köre, saba saat 7-de evlerine silâlı adamlar kirdi.
Keçken afta, mart 6-da, bu iş boyunca Asan Çaruhov yaqalanğan edi. Bir qaç saat devam etken sorğudan soñ onı azat ettiler.
Bundan evel Rusiye Taqiqat komiteti Qırımtatar Milliy Meclisiniñ reis muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgilediler.
«Fevral 26 künü» işi çerçivesinde uquq qoruyıcılar mitingniñ daa bir iştirakçisi Eskender Kantemirovnı da yaqaladılar. Oña eki aylıq apis cezası belgilendi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
