Link açıqlığı

Tımçuk: FSB Qırımdaki Ukraina havfsızlıq hızmetiniñ sabıq hadimlerini «DNR» ve «LNR» «mahsus hızmetlerine» işke yollay


Ukraina halq deputatı, «İnformatsion qarşılıq» gruppasınıñ reberi Dmıtro Tımçuk bildire ki, Rusiye Federal havfsızlıq hızmeti (FSB) Qırımda Ukraina havfsızlıq hızmetiniñ (SBU) sabıq hadimlerini Donbassnıñ zapt etilgen yerlerine yollamağa azırlana. Keçken sene baarde Rusiye Federal havfsızlıq hızmetine çalışmağa keçken SBU hadimleri Rusiye mahsus hızmetlerinen 3 yıllıq añlaşmanı imzalağan ediler.

«Böylece, Ukraina havfsızlıq hızmetiniñ satqınlarına «göñülli zorlav olaraq» Rostov vilâyetinde azırlıqnı keçip, ileride Donbassta «DNR» ve «LNR» «mahsus hızmetlerinde» çalışmağa teklif etile», – dep yazdı Tımçuk Facebookta.

Onıñ malümatına köre, FSB «terroristik teşkilâtlar erkânında hızmet etecekler Rusiye FSB hızmetlerinde qalacaq», dep vade ete.

«Terroristik teşkilâtlarğa hızmet etecek hadimlerni Qırım ve Aqyar boyunca Rusiye FSB idaresiniñ yolbaşçı yardımcısı A.Y.Maksimenko idare ete», – dep bildire Tıçmuk.

Halq deputatınıñ bergen malümatına köre, Donbassta terroristik teşkilâtlarnıñ «devlet havfsızlıq organlarınıñ şekillenmesinen» Aqyardaki Ukraina havfsızlıq hızmeti idaresiniñ sabıq yolbaşçısı Petr Anatolyeviç Zima oğraşa.

Rusiye Ukraina şarqındaki zıddiyetke alâqası olğanını red ete, lâkin Ukraina akimiyeti, askerler, göñülliler, ve Ğarp memleketleriniñ vekilleri Rusiye askerleriniñ bulunmasını isbatlağan ediler.

XS
SM
MD
LG