Rusiye ve işğal etilgen Qırımğa kirişi 5 yılğa yasaq etilgen Qırımtatar Milliy Meclisiniñ reisi mesleatçısı, cemaat erbabı İsmet Yükselniñ imayesi Moskvanıñ Meşçanskiy rayon mahkemesiniñ işni devlet sırı olğanından sebep Moskva şeer mahkemesine bermek qararına şikâyet etti.
Bunı QHA agentligine adliyeci İllarion Vasilyev bildirdi.
«Men buña razı degil edim, çünki Yükselniñ Rusiyege kiriş yasağı işini gizlemek içün sebep yoq edi. Bu yasaq insan aqlarını boza, «Devlet sırı aqqında» qanun ise insan aqlarını bozuv malümatları gizlenmemek kerek olğanını tasdıqlay», – dep ayttı adliyeci.
Onıñ bildirgenine köre, Moskva şeer mahkemesiniñ vatandaş işleri boyunca mahkemeciler bunıñ kibi şikâyetlerni tataflarğa haber etmeyip baqmaq aqqından faydalandılar.
Adliyeciniñ qayq etkenine köre, mahsus hızmetler tarafından kiriş yasaqlarına şikâyetlerni gizlev areketleri aqlarnı bozuv ve taraflarnıñ aynı olmaması kibi sayılmaqta.
İsmet YÜksel ailesinen beraber 20 yıldır Qırımda yaşadı. 2014 senesi avgust 10-da oña 5 yıl devamında, 2019 senesi iyün 30-ğa qadar, Qırımğa kelmege yasaq ettiler.
O, işbu qarar boyunca dava açtırdı. Dava arizası em Aqmescitte, em de Moskvada berilgen edi. Aqmescitniñ Kiyev rayon mahkemesi arizanı baqmayıp qaytardı.
