Mart 11-de Qırımda «fevral 26 işi» boyunca daa bir qırımtatarı yaqalandı.
Qırım.Aqiqat mühbiri bildire ki, çarşenbe saba Qurman rayonınıñ Temir köyünde (Yastrebovka) 1984 senesi doğma Talât Yunusov yaqalandı.
Babası Asan Yunusovnıñ aytqanına köre, saba saat 7-de evge silâlı adamlar kirdi.
«Olar bir şey añlatmayıp, Talât fevral 26-da mitingde iştirak etkenini kameralar çıqarğanını aytıp, onı birisine beden zararda şeklegenini bildirdiler. Onı Aqmescitke alıp keteceklerini ayttılar. O, bağğa çıqmay», – dep ayta babası.
Keçken afta bu iş boyunca Asan Çaruhov yaqalanğan edi. Bir qaç saat devam etken sorğudan soñ onı azat ettiler.
Bundan evel Rusiye Taqiqat komiteti Qırımtatar Milliy Meclisiniñ reis muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgilediler.
«Fevral 26 künü» işi çerçivesinde uquq qoruyıcılar mitingniñ daa bir iştirakçisi Eskender Kantemirovnı da yaqaladılar. Oña eki aylıq apis cezası belgilendi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
