Qırımtatar halqınıñ lideri, Ukraina prezidentiniñ qırımtatar halqınıñ işlerinden vekâletlisi Mustafa Cemilev salı künü, mart 10-da, Vilniuste keçirilgen demokratiya meseleleriniñ Parlament forumında iştirak etti. Bunı QHA agentligi bildire.
«Men Litvaniya devletine Ukrainanıñ mustaqilligi ve topraq bütünligine qoltutqanı içün minnetdarım. Men Qırımda Rusiye rejimi tarafından aqları bozulğan qırımtatar halqına destek olğanı içün teşekkürlerimni bildirem. Qırımnıñ Litvaniya ile alâqaları uzun tarih tamırlarına saiptir. Bugünki künde olarnı pekitmek kerek», – dedi Mustafa Cemilev.
Malüm ki, «Freedom House» uquq qorçalayıcı teşkilâtı Qırım yarımadasında insan aqlarınıñ bozulması aqqında yañı esabatnı aydınlattı. Esabatta aytıla ki, ukrain yarımadası işğal etilgen soñ Qırım sakinleriniñ vatandaş, siyaset ve insan aqları bozulmaqta.
«Freedom House» malümatına köre, eñ çoq zarar qırımtatarlar köre – mal-mülk aqlarınıñ bozulmasından başlap zorbalıq ve qanunlarnıñ ayrı bir şekilde qullanmasına qadar.
