Link açıqlığı

Monitoringniñ neticeleri: ukrainler qırımtatarlarğa müsbet davranalar


Qırımtatarlarğa munasebet qıtaiy Ukrainada Rusiyeniñ işğal etilgen Qırımğa baqqanda «daa da yahşı», – dep bildirdi «Krım SOS» cemaat teşebbüsiniñ koordinatorı Tamila Taşeva mart 10-da Kiyevdeki brifingde.

«Qıtaiy Ukrainadaki adamlar qırımtatarlarğa işğal etilgen Qırımnıñ işğalci akimiyetinden daa da yahşı davranalar, maalesef. Bizler işğalci akimiyetten bir şey beklemedik, çünki Rusiye Federatsiyası Qırımğa kirgeninen olarnıñ tarafından yalıñız menfiy şeyler olacağını bile edik: onlarnen ğayıp olğan adam, yüzlernen tintüv, qırımtatarlarnı Qırımğa kirsetmeyler, cinaiy taqiqatlar», – dep qayd etti Taşeva.

Onıñ aytqanına köre, Ukraina sakinleriniñ köçip kelgen qırımtatarlarğa munasebeti eskisi kibi yahşı. Bunı «Krım SOS» teşkilâtı keçirgen monitoring neticeleri tasdıqlay.

«Bu «qardaş halq ve biz olarğa yardım etmege isteymiz» kibi bir şey bar edi. Asılında, büyük deñişmeler de olmadı. Qırımtatarlarğa müsbet davranalar. Bunıñ kibi munasebetler Herson regionı ve Lvovda qayd etilmekte. Eñ çoq qırımtatarını bu regionlar qabul etti, ve olarğa yahşı yanaşalar», – dedi Tamila Taşeva.

«Krım SOS» keçirgen tedqiq neticelerine köre, qırımtatarlar Qırım işğaline qarşı çıqqan adamlar kibi qabul etile.

Ukraina İçtimaiy siyaset nazirliginiñ soñki malümatına köre, Ukrainanıñ farqlı regionlarında Qırım, Donetsk ve Lugansk vilâyetlerinden köçip kelgen 1,07 million adam qayd etilgen.

XS
SM
MD
LG