Aqyarda yaşağan sakinlerniñ 37,6% şeerni qapalı arbiy-deñiz baza olarаq körmek istey, 33,7% Aqyarnıñ «çoq funktsional şeer-polis» olğanını istey.
Bunı yerli ForPost internet-neşiri tarafından 2015 senesi mart 4-10 künleri keçirilgen sorav köstere.
Soravda Aqyar keleceginiñ diger variantları da bar edi. Paytaht şeer olğanını insanlarnıñ 5,2% alğışladı, ilmiy şeer – 3,8%, turistik merkez – 5,6%, deñiz yalısındaki vilâyet – 10,5%, başqa bir şey – 3,5%. Umumen soravğa 2441 insan qoşuldı.
Neşirde qayd etilgeni kibi, rey bergenlerniñ 50% 50 yaştan büyük olğan erkekler teşkil etti.
Qırımlılarnıñ fikrini ögrengen soñki soravlardan biri «Krımskaya Pravda» gazetasınıñ internet sayıtnda keçirildi. Qırım statusı aqqında sorav beklenilmegen neticelerge ketirdi.
«Krımskaya pravda» «Siz umumqırım referendumınıñ suallerine bugün nasıl cevap berir ediñiz?» sualini bergen edi. Rey bergenlerniñ 61% «Qırımnıñ Ukraina terkibinde keñ vekâletlerini» saylaycağını bildirdi. Mart 9 künü saat 8:00-ge qadar 4510 insan sevap berdi. Rusiyege 19% qoşulır edi, daa 20% «referendumğa kelmez edi».
Muarririyetniñ resmiy beyanatında aytıla ki, «Krımskaya pravda» neşiriniñ saytı DdoS-ücümine oğradı.
