Mart 9 künü, ukrain şairi Taras Şevçenkonıñ 201 yıllığına bağışlanğan aktsiyadan soñ, yaqalanğan faallerniñ işleri boyunca mahkemeni martnıñ 11-ne keçirdiler.
Qırım.Aqiqat mühbiri aytqanı kibi, mart 10 künü toplaşuvnı yarım saatke keçiktirip başladılar. Faaller ukrain kölmeklerinde, sarı-mavı şeritçikler ile ve adliyecilersiz keldiler. Toplaşuv tahminen bir saat sürdi. Neticede faallerni birer-birer makeme etmege qarar alıp, toplaşuvnı martnıñ 11-ne keçirdiler.
Bunıñ ile mahkemeci faallerniñ iş malümatı ile tanışmaq içün vaqıt bermek ricasını qabul etti. Faallerden biri – Vilidar Şukurciyev, mahkemeni bir aftağa avuştırmağa rica etti, amma malümatnı ögrenmek içün bir afta tek berdiler.
Mart 9 künü faalerni – Leonid Kuzmin, Aleksandr Kravçenko ve Vilidar Şukurciyevni politsiya hadimleri yaqaladı, olarnıñ sözlerine köre, sebep – mitingde ukrain timsalleriniñ olmasıdır.
Faallerni bölükte üç buçuq saat tutıp, yolladılar. Miting teşkilâtçısı Leonid Kuzminni Rusiye Federatsiyasınıñ memuriy bozuluvlar aqqında Kodeksiniñ 20-maddesi boyunca qabaatlaylar – toplaşuv, miting, numayış, yürüşniñ belgilengen nizamınıñ bozuluvı.
Mart 10 künü Aqmescitte saat 11:00 faallerni makeme etmege başladılar. Cemaatçı ve matbuat vastalarınıñ vekillerini toplaşuvğa kirsetmediler.
