Taras Şevçenkonıñ doğğan künü munasebeti ile keçirilgen aktsiyanıñ iştirakçilerini politsiyanıñ Jeleznodorojnıy rayon bölüginden azat ettiler. Bunı Qırım.Aqiqat mühbiri bildire.
Piket iştirakçilerini politsiya bölüginde üç buçuq saat tuttılar.
Yaqalanğanlardan biri Leonid Kuzmin bildire ki, bölükte oña sualler berip, yaqalav aqqında protokol tizdiler.
«Mence, yaqalanğanımıznıñ sebebi Ukraina timsalleri oldı», – dep ayttı faal.
Onıñ bildirgenine köre, politsiya hadimleri onı Rusiye Federatsiyansınıñ Memuriy bozuvlar aqqında Kodeksiniñ 20-nci maddesine köre mesüliyetke çekecek olalar – nizamnı bozuv ya da toplaşuv, miting, numayış, yürüş ya da piket ötkerilmesi. Jeleznodorojnıy rayon mahkemesiniñ toplaşuvı mart 10-da saat 11.00 ötkerilecektir.
Kuzmin ile beraber Aqmescit sakinleri Aleksandr Kravçenko ve Vilidar Şukurciyev yaqalanğan edi. Şukurciyev politsiya bölüginden çıqqanda jurnalistlerniñ ögünde Ukraina bayrağını köterip, bu, politsiya hadimleriniñ fikirince, ekstremizm olğanını ayttı.
Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Politsiya hadimleriniñ sözlerine köre, sebep – mitingde ukrain timsalleriniñ olması.
Aqmescitliler Şevçenkonıñ 201 yıllığına aktsiyanı Şevçenko abidesi yanında keçirecek ediler. Amma Aqmescit memuriyeti buña izin bermedi.
