Aqmescitte ekskavator Merkeziy bazarda yerleşken alış-veriş merkezini yıqa. Bunı Qırım.Aqiqat mühbiri bildire.
İnşaatnı gece saat üçte yıqmağa başladılar. Ticaret yerleriniñ kiracılarından biri İgor Parolânıñ aytqanına köre, mahkemeniñ böyle bir qararı olmadı.
«Mahkeme çarşenbe künü, 11-de olacaq. Yıquv qararı yoq edi. Bina vesiqaları bizde bar. Ticaret litsenziyaları aynı bu binağa berilgen edi», – dep ayttı kiracı.
Onıñ bildirgenine köre, binanı yıqqan adamlar özüni tanıtmayıp, bir de bir vesiqalarnı bile köstermediler. Parolâ politsiyanı çağırdı, lâkin İçki işler nazirliginiñ hadimleri bir şey yapmayıp, aylanıp kettiler.
İnşaatnıñ yanında betlerini qapatqan adamlar tura. Alış-veriş merkezini yıqqan adamlar özüni tanıtmağa ve Qırım.Aqiqatnıñ mühbirine olğanlarnı añlatmaq istemediler.
Aqmescit memuriyeti ve Qırım akimiyetiniñ diger organları vaziyetni izaatlamaylar.
