Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Al-azırda olar Qırım Cumhuriyeti boyunca içki işler nazirliginiñ Demir yol bölüginde bulunalar. Bunı vaqia yerinde olğan Qırım.Aqiqat mühbiri bildire.
Şevçenko 201 yıllığına bağışlanğan aktsiya Aqmescitniñ Gagarin bağçasında keçti. Umumen oña bir 50 insan qoşuldı. Toplanğanlar şairniñ şiirlerini oquy ve «Ukrainağa şan-şerefler olsun! Qaramanlarğa şan şerefler olsun!» şiarını seslendire ediler. Mitingde bir qırımtatar ve eki ukrain bayrağı açıldı. Birinde «Qırım – Ukrainadır» dep yazılğan edi.
Aktsiya tınç keçti. Soñunda insanlar dağılmağa başlağanda, politsiya hadimleri mitingniñ teşkilâtçısı Leonid Kuzmin ve daa eki iştirakçini yaqaladı. Politsiya hadimleriniñ sözlerine köre, sebep – mitingde ukrain timsalleriniñ olması.
Mitingniñ bir 15 iştirakçsi politsiya hadimlerini ve yaqalanğanlarnı Qırım Cumhuriyeti boyunca içki işler nazirliginiñ Demir yol bölügine qadar ozğarıp, şimdi de bina yanında bulunalar.
Başta aqmescitliler Şevçenko 201 yıllığına aktsiyanı Şevçenko abidesi yanında keçirecek ediler. Amma Aqmescit memuriyeti buña izin bermedi.
