Qırımtatar Milliy Meclisinde azalığı toqtatılğan Devlet şurasınıñ spiker muavini Remzi İlyasov aman-aman bir buçuq sene keçken soñ Meclisniñ şimdiki reisi Refat Çubarovnıñ qanunğa uymasından şübelenip başladı.
İlyasovnıñ yardımcısı tarqatqan izaatlarda aytıla ki, «evelden bir de bir qarar qabul etilgende Qurultaynıñ bazı delegatlarına fraktsiyalarğa kirmegen delegatlar gruppaları tarafından basqı yapıla edi».
İlyasovnıñ aytqanına köre, 2013 senesi oktâbr ayında Qırımtatar Milliy Meclisiniñ reisi saylanğanda bunı Qurultaynıñ diger delegatları da añladılar.
«Mustafa Cemilev (Meclisniñ sabıq reisi – muar.) tarafından yapılğan avtoritar basqını qayd etmege ister edim. O vaqıt şantaj, qorqutuv ve diger tesir usulları qullanılğan edi – şunıñ içün Meclis reisiniñ qanunğa uyması şübe doğurmaqta», – dedi İlyasov.
Onıñ qayd etkenine köre, Çubarov qırımtatar halqınıñ meselelerini çezmek içün akimiyet ile dialog qurmağa istegen raqibini qabaatlap, özü «Qurultaydan soñ ertesi künü Mustafa Cemilevniñ fikrine qulaq asmayıp, şimdiki akimiyet ögünde tiz çökmek içün «çapıp keldi». Belki de, bu daa bir siyasiy oyun edi».
Malüm ki, 2013 senesi oktâbr ayında Qurultay sessiyasında Meclis reisi olaraq Refat Çubarov saylanğan edi.
Şimdi ise İlyasov qırımtatar halqı temsil organınıñ reberligini deñiştirmek içün Meclis ve Qurultay toplaşuvını keçirecek ola.
Rusiye akimiyeti Mustafa Cemilev ve Refat Çubarovğa Qırımğa kirişini beş yılğa yasaq ettiler.
