Link açıqlığı

Rusiye Federal havfsızlıq hızmeti: Nemtsovnıñ öldürüvi işiniñ eki şeklengen adamını yaqaladılar


Rusiye Federal havfsızlıq hızmetiniñ müdiri Aleksandr Bortnikov muhalifetçi Boris Nemtsovnıñ öldürüvi aqqında iş boyunca eki şeklengen insannı yaqalağanlarını bildirdi, – dep haber ete Radio Svoboda.

«İş neticesinde bugün eki şeklengen şahıs yaqalandı. Bu Kubaş Anzor ve Dadayev Zaur», – dep ayttı Bortnikov Pervıy kanal Rusiye telekanalınıñ yayınında.

Onıñ aytqanına köre, yaqalanğanlar Qavkazlılardır.

FSB resmiy saytı bunı bildirmey.

Rusiye muhalifetiniñ liderlerinden biri Boris Nemtsov fevral 27-de aqşam Moskvanıñ merkezinde Kremlden 200 metrlik mesafede atıp öldürildi.

Öldürilgen Rusiye muhalifetçisi Boris Nemtsovnı Troyekurovskoye mezarlığında defin ettiler. Salı künü, mart 3-te, bir qaç saat sürgen vedalaşuv merasimine biñlernen adam siyasetçinen vedalaşmağa keldi.

Merasim bitken soñ adamlar «Rusiye serbest olacaq!», dep qıçırmağa başladılar.

Rusiye taqiqat komitetiniñ malümatına köre, işniñ şaatlarını sorğuğa çekeler, nezaret kameralarınıñ videosı baqıldı, mahkeme teşkerüvleri belgilendi.

Taqiqatçılar öldürüvniñ bir qaç versiyasını baqmaqtalar: siyasiy provokatsiya, ekstremistlerniñ intiqamı, «ukrain izi», şahsiy munasebetler.

XS
SM
MD
LG