Yuqarı Radada «Qırım – Ukrainadır!» fotosergisi açıldı. Teşkilâtçılardan biri, «Ukrain evi» iş ve medeniyet işbirlgi Qırım merkezi» cemaat teşkilâtınıñ reisi Andriy Şçekunnıñ bildirgenine köre, fotosergi yarımada işğaline bağışlanğan informatsion kampaniya çerçivesinde teşkil etildi.
Onıñ aytqanına köre, fotoserginiñ maqsadı – deputatlarnıñ işğal etilgen topraqlar meselesine diqqatlarını celp etmek ve qırımlılarnı qorçalav faaliyetini inkişaf ettirmek.
«Qırım» fraktsiyalarara birleşesiniñ deputatları ile dialog quruldı, bu informatsion kampaniya birleşmeniñ reisi Aleksey Gonçarenko sayesinde parlament binasına keldi», – dedi Andriy Şçekun.
Sergi mart 15-ke qadar devam etecek.
Yuqarı Radada ukraince, qırımtatarca, rusça ve inglizce «Qırım – Ukrainadır» levhası yerleştirildi.
Qırım işğali yıllığında Ukrainada informatsion kampaniya başlandı, onıñ teşkilâtçıları Qırımdan köçip kelgenlerniñ cemaat teşkilâtları oldı. Kampaniya çerçivesinde fotosergi, brifing, telemarafon ve konferentsiyalarnıñ ötkerilmesi beklenile.
İnformatsion kampaniya aprel 10-ğa qadar devam etip, Yuqarı Radada cemaat diñlevi ile yekünlenecek.
Teşkilâtçılar arasında – «Krım SOS» cemaat teşebbüsi, «Ukrain evi», «Almenda» maarif merkezi, Qırımnıñ strategik tedqiqler institutı, «Euromaydan SOS», «Gromadske» radiosı ve diger teşkilâtlar.
