Link açıqlığı

Uquq qoruyıcılar qırımtatar faali Asan Çaruhovnı bir qaç saat devam etken sorğudan soñ azat ettiler. Bunı cuma künü, mart 6-da, Qırımtatar Milliy Meclisiniñ reis muavini Nariman Celâl Facebook saifesinde bildirdi.

Onıñ aytqanına köre, faalni daa bir sorğuğa çeke bileler.

«Asan Çaruhov taqiqat komitetiniñ hadimleri tarafından azat etildi. Amma keyfinden körüne ki, iş devam etecek ve ileride de «davet etecekler», – aytıla haberde.

Asan Çaruhovnıñ yaqalanması mart 6-da saba belli oldı. Qırımtatar Milliy Meclisiniñ reis muavini Nariman Celâl bildirdi ki, Asannı «fevral 26 işi» boyunca sorğuğa alıp kettiler. Onı Keriç hastahanesinden işten aldılar.

Rusiye Taqiqat komiteti Meclis reisiniñ muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgiledi.

Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesüliyetke çekildi.

2014 senesi fevral 26-da Qırım parlamenti yanında Qırımnıñ Ukrainadan ayırılmasına qarşı çıqqanlarnıñ ve bunıñ tarafdarları olğanlarnıñ büyük mitingi olıp keçken edi. Birinciler saflarında qırımtatarlar, Meclis vekilleri ve Ukrainağa qoltutqan faaller bar edi, olarğa qarşı Sergey Aksenov yolbaşçılıgında «Rus birligi» («Russkoye yedinstvo») teşkil etken Rusiyege qoltutqan faaller çıqtılar.

XS
SM
MD
LG