Keriç parom keçitinde yük maşinalarınıñ sayısı 1270-ten ziyade oldı. Bunı cuma künü, mart 6-da, «Yekâne naqliyat müdirliginiñ» matbuat hızmeti bildire.
Berilgen malümatqa köre, Krasnodar ülkesi tarafından 1024 yük maşinası sırasını bekley. Olardan 280 yük maşinası Novorossiysk limanı – Keriç deñiz ticaret limanı yolunda, 744 yük maşinası Kavkaz limanı – Qırım limanı nevbetinde tura.
Qırım tarafından 254 yük maşinası qayd etildi. Keriç deñiz ticaret limanı – Novorossiysk limanı yolunda 6 yük maşinası, Qırım limanı – Kavkaz limanı yolunda 248 yük maşinası nevbetini bekley.
«Yekâne naqliyat müdirliginiñ» monitoring hızmetiniñ malümatına köre, Keriç keçiti cedvelge köre çalışa. Keçitte cuma künü, mart 6-da, «İonas» ve «Olimpiada» paromları çalışmaqta. Yengil maşinalarnıñ nevbeti yoq. Ava yahşı, yel süratı saniyede 7 metrni teşkil ete.
Meteo hızmeti bildire ki, mart 7-den mart 9-ğa qadar Keriç boğazında ava bozula bile. Mart 7-de yel süratı saniyede 20 metrge qadar artsa, furtuna havfı ilân etilmesi mümkün. Böylece keçitniñ işi toqtatıla bile.
