Link açıqlığı

Saatnıñ esas haberi

Aqyarda mart 18 künü «Rusiye ile birleşüv» munasebetinen bayram oldı


Aqyarda dört yerli bayram qayd etilecek. Böyle bir qanun Şeerniñ qanun çıqarıcı meclisiniñ nevbetten tış toplaşuvında qabul etildi.

Vesiqağa binaen, mart 18 künü «Aqyarnıñ Rusiye ile birleşüv künü» olaraq ilân etildi. Endiden soñ bu kün bayram ve tatil sayılmaqta, dep haber ete Krım.Media.

«Bizler Qırım Cumhuriyetiniñ zenaatdaşlarımıznen muzakere ettik, bizler federal seviyede bütün Rusiye içün tatil olacaq mart 18-niñ bayram olaraq belgilenmesine teşebbüs kösterecek olamız», – dep ayttı Aqyar qanun çıqarıcı meclisiniñ reis muavini Yekaterina Altabayeva.

Yerli bayramlar olaraq şular da belgilendi: fevral 23 – Halq iradesi künü, aprel 14 – Aqyar şeeriniñ nizamnamesi künü, iyün 14 – Aqyarnıñ qurulış künü.

2014 senesi fevralniñ soñunda – martnıñ başında Rusiye ve Rusiyeniñ Qara deñiz flotunıñ qırım bölüklerinden ordular Qırım yarımadanı zapt ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG