Qırım uquq qoruyıcılarınıñ Qırımtatar Milliy Qurultayı Merkeziy saylav komissiyasınıñ reisi Zair Smedlâyevge bergen malümatlarına köre, şimdilik qırımtatar faali Asan Çaruhovnı apske almaq ya da devamlı yaqalamaq içün sebep yoq. Faalni mart 6-da saba Keriçten Aqmescitke sorğuğa alıp ketken ediler.
Bunı Smedlâyev Qırım.Aqiqatqa bildirdi.
Onıñ aytqanına köre, uquq qoruyıcılar sorğu «fevral 26 işi» boyunca olacağını tasdıqladılar.
«Men uquq qoruyıcılarnıñ vekilleri ile laf ettim, dediler ki, taqiqat tedbirleri keçirilmekte, sorğu 2014 senesi fevral 26-nıñ vaqiaları boyunca olacaq ve yaqalamaq sebepleri yoq, ğaliba», – dedi Smedlâyev.
Faqat onıñ qayd etkenine köre, arbiylerniñ aytqanlarına inanmaq zor.
«Bunıñ soñu ne olacağını bilmeyim, lâkin onı yaqalamaq içün sebep yoq, o, birisini köteklemedi, bu mitingniñ teşkilâtçısı olmay», – dep qayd etti Smedlâyev.
Onıñ malümatına köre, Asan Çaruhov ile bağ yoq, o, Qırımnıñ Taqiqat komitetindedir.
Smedlâyev bildirdi ki, Taqiqat komitetiniñ yanında faalniñ ana-babası buluna.
Asan Çaruhovnıñ yaqalanması mart 6-da saba belli oldı. Qırımtatar Milliy Meclisiniñ reis muavini Nariman Celâl bildirdi ki, Asannı «fevral 26 işi» boyunca sorğuğa alıp kettiler. Onı Keriç hastahanesinden işten aldılar.
Rusiye Taqiqat komiteti Meclis reisiniñ muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgiledi.
Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesüliyetke çekildi.
2014 senesi fevral 26-da Qırım parlamenti yanında Qırımnıñ Ukrainadan ayırılmasına qarşı çıqqanlarnıñ ve bunıñ tarafdarları olğanlarnıñ büyük mitingi olıp keçken edi. Birinciler saflarında qırımtatarlar, Meclis vekilleri ve Ukrainağa qoltutqan faaller bar edi, olarğa qarşı Sergey Aksenov yolbaşçılıgında «Rus birligi» («Russkoye yedinstvo») teşkil etken Rusiyege qoltutqan faaller çıqtılar.
