İstanbulda, mart 5 künü, tacik muhalifetniñ yetekçilerinden biri Umarali Kuvvatovnı öldürdiler, haber ete «Sabah» türk gazetası.
Onıñ apayı ve eki ufaq balası zeerlenüv alâmetleri ile hastahanege ketirildi.
Öldürilgen siyasetçiniñ soyları aytqanı kibi, aqşam 47 yaşında Kuvvatov qorantası ile musafirlikke davet etilgen edi. Aqşam yemeginden soñ Kuvvatov özüni yaramay duyıp, azbarğa çıqtı, mında belgisiz şahıs başına pıştavdan attı. Onıñ apayı ve eki balası tuvğanlarına öldürüv aqqında bildirip, esini coydılar.
Tacikistan prezidenti Emomali Rahmonov tuvğanlarınıñ ticariy şerigi olğan Kuvvatov peyda olğan ticariy añlaşamamazlıqlardаn sebep 2012 senesi memleketten Rusiyege köçe. Moskvada «Gruppa 24» muhalif teşkilâtını aça ve Tacikistan akimiyetini qattı tenqitke oğrata.
2012 senesi soñunda Duşanbe soratuvı ile Birleşken Arap Emirliginde yaqalandı, birazdan azat etilip, Türkiyege köçti.
Bıltır oktâbr ayında Tacikistannıñ Yuqarı mahkemesi «Gruppa 24» ekstremist teşkilât olaraq adladı ve cumhuriyet territoriyasında faaliyetini yasaq etti.
Tacikistan akimiyeti Kuvvatovnıñ öldürüvini izaatlamay.
