Link açıqlığı

Keriçte yaqalanğan Asan Çaruhovnıñ tuvğanları onıñ ile bağ qurıp olamayıp, ömrü içün qasevet çekeler.

Bunı Qırım.Aqiqatqa yaqalanğannıñ babası Seitvaap Çaruhov bildirdi.

«Keriçte, hastahanede, travmatolog-hirurg olıp çalışa. Yaqalanğanı aqqında maña hastahane hadimleri bildirdiler. Şimdi Aqmescitte bulunğanını bilem, bu qadar. Onıñ ile bağ yoq, laf etip olamayım. Şimdi Aqyardam, Aqmescitke barıp qıdıracam onı», – dey Asannıñ babası.

Babası 2014 senesi mart 3-de Qırım Nazirler Şurası binası yanına narazılığı ile çıqqan, soñra ise cansız alda taplığan Reşat Ametovnıñ taqdiri tekrarlanmasın dep qorqa. Ametovnıñ öldürüvi alâ daa taqiq etilmegen.

Asan Çaruhovnıñ yaqalanuvı aqqında mart 6-da, saba, belli oldı. Qırımtatar Milliy Meclis reisi Nariman Celâl aytqanı kibi, Asannı «fevral 26» işi boyunca sorğuğa çekecekler.

Evel Rusiye Taqiqat komiteti Meclis reis muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgiledi.

Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesülietke çekildi.

2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.

Yarın Qırımdaki memuriy binalar «yeşil adamçıqlar» tarafından zapt etildi, neticede Rusiye arbiyleri yarımadanı işğal ete ve mart 16 künü «referendum» ötkerile.

Neticede, Rusiye yarımadanı öz terkibine qoşa. Ne Ukraina, ne Avropa birligi, ne AQŞ işbu rey berüvni tanımay ve Qırım Rusiye tarafından işğal etilgenini qayd eteler.

XS
SM
MD
LG