Keriçte «fevral 26» işi boyunca Asan Çaruhovnı yaqaladılar.
Bunı Qırımtatar Milliy Meclis reisiniñ muavini Nariman Celâl bildirdi.
Onıñ malümatına köre, oğlunıñ yaqalanğanı aqqında Asannıñ babası haber etti. Uquq qoruyıcılar Asannı iş yeri olğan Keriç hastahanesinden alıp kettiler.
«Yarım saat evelsi Asan Çaruhovnıñ babası Seitvaap ağa telefon etip, oğlunı iş yeri olğan Keriç hastahanesinden uquq qoruyıcılar alıp ketkeni aqqında bildirdi. Al-azırda belli olğanı kibi, onı «fevral 26» işi boyunca sorğuğa çekip, yollaycaqlar», – dep yazdı Celâl Facebookta.
Evel Rusiye Taqiqat komiteti Meclis reis muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgiledi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
Yarın Qırımdaki memuriy binalar «yeşil adamçıqlar» tarafından zapt etildi, neticede Rusiye arbiyleri yarımadanı işğal ete ve mart 16 künü «referendum» ötkerile.
Neticede, Rusiye yarımadanı öz terkibine qoşa. Ne Ukraina, ne Avropa birligi, ne AQŞ işbu rey berüvni tanımay ve Qırım Rusiye tarafından işğal etilgenini qayd eteler.
