«Qırımtatarlarnıñ qarşılıq areketi» spiker muavini Remzi İlyasovnıñ başlığında yañı teşkil etilgen «Qırım» qırımtatar cemaat birliginiñ Meclis faaliyetini muzakere etmek ve Qırım tamır halqınıñ kelecegini belgilemek maqsadı ile Qurultaynı çağırmaq niyetine narazılığını bildirdi.
Bu aqta Areket koordinatorlarınıñ mütenasip vesiqasında aytıla.
«Qırım Cumhuriyetiniñ Devlet Şurası reis muavini vazifesini eda etken Remzi İlyasovnıñ Qırımtatar Milliy Meclisine alâqası yoq», – denile beyanatta.
«Qırımtatar Milliy Meclis vekâletlerinden faydalanmaq içün qanuniy negiz ve Milliy Meclisni akimiyet organlarında taqdim etmek içün vekâletleri yoq, bazıları ise bunı yapmağa tırışa», – denile vesiqada.
Öz narazılığında Areket faalleri Qırımtatar Milliy Meclisi qırımtatarlarnıñ yekâne temsiliy organı ve Qırımtatar Milliy Qurultayınıñ icraiy organı olğanı aqta bildireler. Şunıñ içün Meclisniñ qayd etüv ketişatına Qurultaynıñ qararı olmadan irişmege mümkün degil.
«Yuqarıda añılğan şeyler bu kibi bildirüvlerge diqqat etmege sebep olmağanını tasdiqlay. Şunıñ içün «Qırımtatarlarnıñ qarşılıq areketi» koordinatorları devlet struktura memurlarına, akimiyet menfaatında areket etken şahıslarğa öz narazılığını bildire», – qayd eteler faaller.
Mart 3 künü bir sıra qırımtatar cemaat teşkilâtlarınıñ vekilleri Aqmescitte keçirilgen matbuat konferentsiyasında Qırımtatar Milliy Qurultayında «Qırım» firqasınıñ teşkil etilmesi aqqında bildirdiler. Firqağa kirgen vekiller ileride Qurultaynı çağırıp, Meclis reisi Rufat Çubarovnı Qırım spiker muavini, «Qırım» areketiniñ başı Remzi İlyasovğa deñiştirecek olalar.
