Qırımtatar Milliy Meclis reisi Refat Çubarov Kiyevde ve Ukraina tışında ukrain aşayt mallarınıñ işğal etilgen yarımadağa ketirilmesini anda insan aqlarınıñ qoruvı ile bağlamaq aqta muzakereler keçirilgenini bildire.
Bunı Çubarov öz Facebook saifesinde yazdı.
«Qırım sakinlerini açlıqta qaldırmaq (Allah saqlasın!) aqta söz ketmey, işğalci akimiyeti insan aqlarına riayet etmek kerek. Bunıñ ile, Ahtem Çiygoznıñ ve Qırımnıñ diger yaqalanğan ve apiste qapalğan sakinleriniñ azat etilmesi alâ daa bizim esas talabımız ola», – qayd etti Meclis reisi.
Onıñ fikrine köre, «Qırım akimiyetiniñ öz halqınıñ aqları oğrunda küreşken ve işğal etilgen Qırımda, milletke baqmadan, insan aqlarını qoruğan qırımtatar milliy areket faallerine olğan nefreti endi bütün sıñırlardan keçti».
Evel, Qırımatatar halqınıñ aq-uquqlarını qorçalav komitetiniñ reberi Eskender Bariyev Qırımda Komitet azalarını taqip etip, sorğularğa çekkenleri aqqında bildirgen edi.
