Rusiyeniñ Federal havfsızlığı hızmetiniñ (FSB) sıñır idaresi Ukrainada Qırım yarımadası ve Çonğar yarımadasını birleştirgen Çonğar boğazındaki eki köpürde mina qoyulğanını qayd etti.
Bunı çarşenbe künü Qırımdaki Rusiye FSB sıñır idaresi matbuat hızmetiniñ vekili İnterfaks Rusiye agentligine bildirdi.
Onıñ aytqanına köre, fevral 17-de «Canköy» ve «Çonğar» sıñır kirişleri arasındaki yolnıñ köprü, em de qullanılmağan eski köpürde minalar qoyuldı.
Matbuat hızmetiniñ hadimi bildire ki, buña baqmadan naqliyat vastalarınıñ ve adamlarnıñ areketi devam etmekte.
Ukraina Devlet sıñır hızmeti bu malümatnı ne tasdıqladı, ne de red etti.
«İşbu mesele milliy havfsızlıqqa aittir, bu sebepten onı izaatlamaycaq», – dep bildirdi ukrain sıñır hızmetiniñ matbuat hızmeti Qırım.Aqiqatqa.
2014 senesi mart ayında Rusiyeniñ Qırım işğalinden soñ qıtaiy Ukraina ve yarımada arasında memuriy, amma asılında kerçek bir sıñır peyda oldı. Qırım ise vaqtınca işğal etilgen topraq olaraq ilân etildi.
