Ukraina Yuqarı Şurasında ukrain, qırımtatar, ingliz ve rus tillerinde yazılğan «Qırım – Ukrainadır» levhası peyda oldı.
Qırım.Aqiqat neşirine «Ukrain evi» Qırım cemaat teşkilâtınıñ reisi Andriy Şçekun aytqanı kibi, böylilkenen «Qırım» firqalarara birligi Qırım işğali munasebeti ile keçirileyatqan aktsiyağa qoşludı.
«Ukraina Yuqarı Şurasınıñ toplaşuv salonında dört tilde yazılğan «Qırım – Ukrainadır» levhası peyda oldı. Halq deputatlarına «Qırım – Ukrainadır» yazısı ile 100 futbolkanı tarqattılar. Bugün Yuqarı Şurasınıñ ayatlarında «Qırım.İşğal» fotosergisi açıldı. Umumiy cemaat aktsiyamıznıñ maqsadı – işğal etilgen Qırımnıñ meselesine cemiyetniñ diqqatını çekmektir», – dedi Andriy Şçekun.
Bunıñ ile işbu levha ukrain uçucısı Nadejda Savçenkonıñ Moskva SİZOsında bulunğanına qarşı tutqan açlıq künleriniñ miqdarını bildire.
Ukrainada Qırım işğaline qarşı informatsion kampaniyası başlandı, teşebbüsçileri Qırımdan köçip kelgenlerniñ cemaat teşkilâtları oldı. Kampaniya çerçivesinde fotosergiler, brifing, telemarafon, konferentsiyalarnıñ keçirilmesi planlaştırıla.
İnformatsion kampaniyası aprel 10-na qadar sürecek ve Ukraina Yuqarı Şurasında Qırım işğaliniñ yıllığı mevzusında cemaat muzakereleri ile yekünler. Kampaniya çerçivesinde Qırımnıñ barışıq qaytarılması boyunca ğaye yarışı, Ukraina Yuqarı Şurasında fotosergi, Ukraina Nazirler Kabinetinde Qırım işğali ile bağlı problemlerniñ al etilmesi boyunca tögerek masa ötkerilecektir.
Teşkilâtçılar arasında – «Krım SOS» cemaat teşebbüsi, «Ukrain evi», «Almenda» maarif merkezi, Strategik taqiqatlarnıñ Qırım institutı, «Yevromaydan SOS», «Gromadske» radiosı ve Qırımdan köçip kelgenlerniñ diger teşkilâtları bar.
