Yalta akimiyeti «McDonald's» restoranı yaz mevsimine qadar şeerge qaytıp kelecegine ümüt besley. Bunı memuriyet başı Andrey Rostenko bildirdi, – haber ete mart 5 künü Yalta şeer şurasınıñ matbuat hızmeti.
«Ümüt etem ki, restoran saipleri mında meraqlı ve istiqbal leyhalarnı amelge keçirmek içün imkân tapar. Kurort mevsiminiñ başlanuvına qadar yapılsa, yahşı olur edi – bina boş turmamalı. Bu sebepten saip ile kene muzakere ketişatına başlaymız», – dedi o
Rostenko şunı da qoşıp ayttı ki, Yalta akimiyetine restoran binasını satın almağa istegen iş adamları endi muracaat etken ediler.
«Amma saipler işbu meseleni muzakere etmege azır degil», – dep añlattı memur.
«McDonald's» restoranlar ağı 2014 senesi aprel başında işğal etilgen Qırımda işini toqtattı. Al-azırda Aqmescit, Yalta ve Aqyarda yerleşken restoran binaları boş tura.
Qırımnıñ şimdiki başı Sergey Aksönov Rusiye tarafından işğal etilgen Qırımnıñ akimiyetinde «McDonald's»nıñ boş binalarını milliyleştirmek maqsadı yoq olğanını bildire.
