Qırım musulmanları diniy idaresi 2015 senesi fevral 27-de Rusiye qanuniy alanında qayd etüvini tasdiqlаğan vesiqalarnı elde etti.
Bunı Qırım musulmanları diniy idaresiniñ matbuat hızmeti bildire.
«Qayd etüv şeadetnamesine köre, QMDİniñ tolu serlevası – Qırım Cumhuriyeti ve Aqyar Musulmanlarınıñ Diniy İdaresi Merkezleştirilgen Diniy Teşkilâtı», – dep bildire Qırım Müftiyatı.
Mında diniy teşkilâtlarınıñ qayd etüv müddeti uzatılacağına ümüt besleyler.
Mabuat hızmetinde añlatalar, Qırım musulmanları diniy idaresiniñ terkibinde 350-ge yaqın musulman cemiyeti bar ve martnıñ birine qadar olarnı ğayrıdan qayd etmege imkân yoq edi.
«Cemiyetlerimizge haber ettik ve qayd etüv içün zaruriy malümatnı olarğa tarqattıq. Şimdi cemiyetlerimizniñ Adliye nazirligine muracaat etüv ketişatı üzerinde çalışamız», – dey QMDİ adliyecisi İbraim Kaymakan.
Müftiyatta qayd etilgeni kibi, şimdi Qırımdaki yüzlernen diniy teşkilâtları ticariy olmağan şirketlerniñ qayd etüv müddetiniñ uzatılmasını bekley.
Evel bildirilgeni kibi, mart 1-den Qırımda Rusiye qanunları boyunca qayd etilmegen diniy cemiyetlerniñ faaliyeti yasaqlanacaq.
